കോഴിക്കോട്: പ്രസവ ശസ്ത്രക്രിയക്കിടെ ഹര്‍ഷിനയുടെ വയറ്റില്‍ കത്രിക കുടുങ്ങിയ കേസില്‍ പുതുക്കിയ പ്രതിപ്പട്ടിക പൊലീസ് കോടതിയില്‍ സമര്‍പ്പിച്ചു. കോഴിക്കോട് മെഡിക്കല്‍ കോളജിലുണ്ടായിരുന്ന രണ്ടു ഡോക്ടര്‍മാരും രണ്ട് നേഴ്സുമാരുമാണ് പ്രതിപ്പട്ടികയിലുള്ളത്. ഒന്നാംപ്രതി മഞ്ചേരി മെഡിക്കല്‍ കോളജിലെ അസിസ്റ്റന്റ് പ്രൊഫസര്‍ സി.കെ.രമേശനാണ്. ഇപ്പോള്‍ കോട്ടയത്തെ സ്വകാര്യ ആശുപത്രിയില്‍ ജോലി ചെയ്യുന്ന ഡോ.എം. ഷഹന, നഴ്സുമാരായ എം.രഹ്ന,മഞ്ജു എന്നിവരാണ് പൊലീസ് സമര്‍പ്പിച്ച കുറ്റപത്രത്തിലെ മറ്റ് പ്രതികള്‍.
2017 നവംബറിലാണ് ഹര്‍ഷിനയുടെ പ്രസവ ശസ്ത്രക്രിയ നടന്നത്. ഇന്ന് ശസ്ത്രക്രിയക്ക് നേതൃത്വം നല്‍കിയത് ഈ നാലുപേരായിരുന്നു. അതേസമയം, കുറ്റപത്രം സമര്‍പ്പിച്ചെങ്കിലും ഇവര്‍ക്കെതിരെ അറസ്റ്റോ മറ്റ് നടപടികളോ വേണമെങ്കില്‍ സര്‍ക്കാര്‍ അനുമതി വേണം. അതിനുള്ള ശ്രമത്തിലാണ് അന്വേഷണ സംഘം ഇപ്പോഴുള്ളത്.മെഡിക്കല്‍ കോളജ് എ.സി.പി കെ.സുദര്‍ശന്റെ നേതൃത്വത്തിലാണ് അന്വേഷണം നടക്കുന്നത്.